ខេត្តបន្ទាយមានជ័យ ៖ នៅរសៀលម៉ោង៥ល្ងាច ថ្ងៃទី២២ ខែមេសា ឆ្នាំ២០១៥នេះ បាតុភូតធម្មជាតិភ្លៀង ខ្លាំង និងអមទៅដោយខ្យល់កន្ទ្រាក់ បានបោកបក់កើតឡើងនៅ ស្រុកព្រះនេតព្រះ ដែលធ្វើឱ្យប៉ះពាល់ ដល់ផ្ទះប្រជាពលរដ្ឋក៏ដូចជាទ្រព្យសម្បត្ដិ សាធារណៈជាច្រើនផងដែរ។
លោក លីសុវណ្ណរិទ្ធ អភិបាលស្រុកព្រះនេតព្រះ និងលោកមេឃុំ លោកអធិការស្រុក និង លោកកងរាជអាវុធហត្ថស្រុក បានចុះដកស្រង់ស្ថិតិ ក្នុងការខូចខាតទ្រព្យសម្បត្តិ របស់ប្រជាពលរដ្ឋដែល ត្រូវខ្យល់កន្ត្រក់បំផ្លាញ មាននៅក្នុងឃុំចំនួន២ របស់ស្រុកព្រះនេតព្រះ ខេត្ដបន្ទាយមានជ័យ បណ្ដាលឱ្យ ខូចខាតទ្រព្យសម្បត្តិ និងផ្ទះប្រជាពលរដ្ឋ និងបង្គោលភ្លើង ព្រមទាំងម៉ូតូផងដែរ ប៉ុន្ដែមិនបណ្ដាលឱ្យ រងគ្រោះថ្នាក់ ដល់អាយុជីវិតប្រជាពលរដ្ឋនោះឡើយ ។
យោងតាមរបាយការណ៍របស់នគរបាលស្រុកព្រះនេតព្រះបានបញ្ជាក់ថាគ្រោះធម្មជាតិមួយនេះបានកើតឡើងនៅ២ឃុំគឺទឹកជោ និងឃុំភ្នំលាប ក្នុងនោះសម្រាប់ឃុំទឹកជោ ស្ថិតនៅភូមិតាប៉ុនខូចខាតបង្គោលភ្លើងចំនួន១០បង្គោល សម្រាប់តខ្សែភ្លើងទៅខេត្ដសៀមរាបបង្គោលភ្លើងតូច ៥បង្គោលបង្គោលភ្លើងសង្កត់លើផ្ទះ ប្រជាពលរដ្ឋ ចំនួន៦ខ្នង ខូចម៉ូតូ៣គ្រឿង ។ រីឯឃុំភ្នំលាប រលំផ្ទះចំនួន២ខ្នងផងដែរ ។
លោក លីសុវណ្ពរិទ្ធ បាននិយាយបន្តទៀតថា រូបលោក និងលោកមេឃុំ លោកអធការស្រុក និងលោកអាវុធហត្ថស្រុក ក្នុងមួយយប់ពេញនេះ មិនបានសំរាកឡើយ ចុះប្រត្តិបត្តការក្នុងការចុះមើលផ្ទះប្រជាពលរដ្ឋ ដែលត្រូវបំផ្លាញដោយខ្យល់កន្ត្រាក់ ក្នុងនោះក្រុមការងាររបស់លោក បានជួយរៀបចំទុកដាក់ផ្ទះសំបែង ប្រជាពលរដ្ឋណាដែលខូចខាត ដោយខ្យល់ព្យុះកន្ត្រក់នេះ ឲ្យនៅបណ្តោះអាសន្នផងដែរ ។
គួរបញ្ជាក់ផងដែរថា ស្រុកព្រះនេតព្រះកន្លងទៅថ្មីៗនេះ មានផ្ទះរបស់ប្រជាពលរដ្ឋចំនួនឃុំ ៣ និង១៤ភូមិ ត្រូវទទួលរងគ្រោះដោយសារខ្យល់កន្ត្រាក់ បំផ្លាញអស់ផ្ទះប្រជាពលរដ្ឋចំនួន ៦៦ខ្នង លោក លីសុវណ្ណរិទ្ធ បាននិយាយថាក្នុងឆ្នាំនេះ ក្នុងស្រុកព្រះនេត្រព្រះនេះ មានគ្រោះធម្មជាតិកើតឡើង ២ លើកដែលគួឲ្យ បារម្មណ៍បំផុត៕