មណ្ឌលគីរី÷ភ្នាក់ងារទូរទស្សន៍ប៉ុស្តិ៍លេខ៩ ម្នាក់ឈ្មោះវ៉ាន់ ទិត្យ ភេទប្រុស ត្រូវបានមេបញ្ជាការ កងរាជអាវុធហត្ថខេត្ត បញ្ជាអោយចាប់ខ្លួនកាលពីព្រឹកថ្ងៃទី១១ ខែកុម្ភះ ឆ្នាំ២០១៦ខណៈពេលដែលលោកស្ថិត នៅក្នុងផ្ទះភូមិអូរអាម ឃុំស្រែរខ្ទុម ស្រុកកែវសីមា ។
ប្រភពព័ត៌មានបានអោយដឹងថា ការចាប់ខ្លួនភ្នាក់ងារ ទូរទស្សន៍ប៉ុស្តិ៍លេខ៩ខាងលើនេះ បន្ទាប់ពីស្ថានីយ៍ទូរទស្សន៍មួយនេះ បានផ្សាយព័ត៌មានទាក់ទងបទល្មើស ព្រៃឈើដោយភ្ជាប់ឈ្មោះលោកមេបញ្ជាការកងរាជអាវុធហត្ថ ខេត្តមណ្ឌលគីរីផងដែរ ។
ប្រភពខាងលើរាយការណ៍ថា បន្ទាប់ពីចាប់ខ្លួនភ្នាក់ងារ ទូរទស្សន៍ប៉ុស្តិ៍លេខ៩នោះហើយ លោកសាក់ សារ៉ាង មេបញ្ជាការបានអោយកម្លាំងនាំខ្លួន អ្នកសារព័ត៌មានរូបនោះ មកកាន់ទីបញ្ជាការដ្ឋានខេត្តភ្លាមៗតែម្តង លោកសាក់ សារ៉ាងមេបញ្ជាការកងរាជអាវុធហត្ថ ខេត្តត្រូវបានអ្នកសារព័ត៌មាន សួរនាំទាក់ទងការចាប់ខ្លួន លោកវ៉ាន់ ទិត្យ លោកបានប្រាប់ថា គឺគ្រាន់តែនាំខ្លួនយកមកសួរនាំតែប៉ុណ្ណោះ ទាក់ទងការផ្សព្វផ្សាយ ព័ត៌មាន រឿងបទល្មើសព្រៃឈើនៅខេត្តមណ្ឌលគីរី ហើយភ្ជាប់ឈ្មោះលោកទៅនឹង បាតុភាពនៃការរកស៊ីឈើយ៉ាងណាក៍ដោយ លោក វ៉ាន់ ទិយ្យភ្នាក់ងារទូរទស្សន៍ប៉ុស្តិ៍លេខ៩ ត្រូវបានគេដោះលែងមកវិញក្រោយ ពីប៉ុន្មន ម៉ោងពេលព័ត៌មាននេះ ទៅដល់ឯកឧត្តមរដ្ឋមន្ត្រីក្រសួងព័ត៌មាន ខៀវ កញ្ញារិទ្ធ ហើយដោះលែងមកវិញ វេលាព្រឹកម៉ោង១០.៤០នាទី ថ្ងៃដដែល។ តាមព័ត៌មានលោកវ៉ាន់ ទិត្យត្រូវបានកម្លាំងកងរាជអាវុធហត្ថ សួរនាំរឿង ផ្សព្វផ្សាយព័ត៌ខាងនេះមែន។ ប៉ុន្តែលោកត្រូវគេបង្ខំអោយផ្តិតមេដៃ លើកំណត់ហេតុសួរនាំ នោះមុននឹងធ្វើការដោះលែង។
បណ្តាអ្នកច្បាប់បានលើកឡើងថា ការចាប់ខ្លួនឬឃាត់ខ្លួនអ្នកសារព័ត៌មានគឺជាការអនុវត្តខុស ពីនិតិវិធីយ៉ាងធ្ងន់ធ្ងរ ព្រោះថារាល់ការចាប់ខ្លួនឃាត់ខ្លួន ឬ កោះហៅមកសួរនាំដាច់ខាតត្រូវឆ្លងកាត់ប្រព័ន្ធតុលាការ ហើយបើអ្នកណាម្នាក់បញ្ជា អោយធ្វើសកម្មភាពទាំងនោះ គឺជាការរំលោភលើច្បាប់ធ្ងន់ធ្ងរ មិនអាចអោយរួចខ្លួនបានឡើយ។បណ្តាអ្នកច្បាប់បានបញ្ជាក់ថា ការនាំខ្លួនអ្នកសារព័ត៌មានទាំងបង្ខំពីផ្ទះសាម៊ីជន ហើយនាំយកមកដល់ទីបញ្ជាការដ្ឋានPM ខេត្តរួមទាំងបង្ខំអោយផ្តិតមេដៃលើកំណត់ហេតុ គឺជាការប្រើអំណាចក្រៅប្រព័ន្ធច្បាប់ហើយសាម៉ីខ្លួន អាចប្តឹងបកវិញបាន ។ ប៉ុន្តែអ្វីដែលគេមានការភ្ជាក់ផ្អើលនោះ គឺការឃាត់ខ្លួនអ្នកសារព័ត៌មានក្រៅប្រព័ន្ធច្បាប់ ដែលស្ថាប័នពាក់ព័ន្ធមិនអាចមើលរំលងបានឡើយ ទោះជាអ្នកនោះមានអំណាច បុណ្យស័ក្កឋានៈជាអ្វីក៏ដោយ ។
សារព័ត៌មានយើងមិនទាន់អាចទំនាក់ទំនង សុំការបញ្ជាក់ពីលោកសាក់សារ៉ាង មេបញ្ជាការPMខេត្តមណ្ឌលគីរីបាននៅឡើយទេ ទាក់ទងព័ត៌មានខាងលើ ៕