ខេត្តបន្ទាយមានជ័យ ៖ មានករណីគ្រោះថ្នាក់ចរាចរណ៏មួយ បានកើតឡើងរវាងម៉ូតូបើកទៅបុកគោយន្តច្នៃ បណ្តាលឲ្យម្នាក់បានរងរបួសធ្ងន់ លើកំណាត់ផ្លូវខេត្ត រង្វង់មូលយាយជី-ស្រមោច ចំភូមិផ្លូវសៀម ឃុំគយម៉ែងស្រុកមង្គលបូរី វេលាម៉ៅង៧និង៣០យប់ ថ្ងៃទី២មេសា២០១៥។
លោក ហ៊ីង ហាន អធិការរងនគរបាលស្រុកមង្គលបូរីអោយដឹងថា ជនរងគ្រោះឈ្មោះ ប៊ុន សាឡត ភេទប្រុសអាយុ ២៤ឆ្នាំ រស់នៅភូមិស្តីក្រោម ឃុំគយម៉ែងស្រុកមង្គលបូរី ខេត្តបន្ទាយមានជ័យ បានរងរបួសធ្ងន់ត្រង់ក្បាល ផ្នែកខាងមុខស្តាំ ត្រូវបញ្ជូនទៅសង្គ្រោះនៅមន្ទីរពេទ្យបង្អែក ខេត្តមិត្តភាពកម្ពុជា-ជប៉ុនមង្គលបូរី។ជននេះបានបើកបរម៉ូតូម៉ាក ហុងដា សេ១២៤ ពណ៍ខ្មៅឆ្នាំ២០១៣ ពាក់ស្លាកលេខបាត់ដំបង ១G៩០៥៨ ។
លោកបន្តថា រថយន្តច្នៃពណ៍បែតង ដឹកកកបើកបរដោយឈ្មោះ ដៀបសំអាត ភេទប្រុសអាយុ៥០ឆ្នាំរស់នៅភូមិផ្លូវសៀម ឃុំគយម៉ែងដែរ។
គ្រោះថ្នាក់នេះគឺម៉ូតូបើក ក្នុងទិសដៅពីលិចទៅកើត បានបើកទៅបុកចំពាក់កណ្តាលតួរថយន្តច្នៃ ផ្នែកខាងស្តាំដែលកំពុងថយចូលផ្ទះ ចំណែកម៉ូតូខូចខាតទាំងស្រុង។បច្ចុប្បន្នត្រូវបានយកមករក្សាទុក អធិការដ្ឋានរងចាំ ការដោះស្រាយនៅពេលក្រោយក្រោយ៕