ខេត្តកំពង់ស្ពឺ ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាលសមាគមក្រុមគ្រូពេទ្យយុវជនស្ម័គ្រចិត្តសម្ដេចតេជោ (TYDA) បានដឹកនាំក្រុមគ្រូពេទ្យ TYDA ចុះពិនិត្យព្យាបាលជំងឺដោយឥតគិតថ្លៃ ជូនដល់ប្រជាពលរដ្ឋប្រមាណជាង ៤ពាន់គ្រួសារ នៅក្នុងខេត្តកំពង់ស្ពឺ ។
ក្នុងពិធីសំណេះសំណាល និងពិនិត្យព្យាបាលជំងឺពលរដ្ឋពលរដ្ឋ ស្ថិតក្នុងបរិវេណវិទ្យាល័យហ៊ុនសែនចាន់ថ្នាល ភូមិអំពិលផ្អែម ឃុំក្រាំងចេក ស្រុកសាមគ្គីមុន្នីជ័យ នៅថ្ងៃទី២៨ ខែកុម្ភៈ ឆ្នាំ២០២៦ លោកជំទាវបណ្ឌិត មានប្រសាសន៍ថា សកម្មភាពរបស់ក្រុមគ្រូពេទ្យ TYDA នេះ គឺស្របទៅនឹងកម្មវិធីនយោបាយរបស់រាជរដ្ឋាភិបាល លើការងារលើកកម្ពស់សុខុមាលភាពប្រជាពលរដ្ឋ ដោយគ្មានការរើសអើងនិន្នាការនយោបាយ វណ្ណៈ ពណ៌សម្បុរ គឺខិតខំប្រឹងប្រែងធ្វើយ៉ាងណាឱ្យប្រជាពលរដ្ឋគ្រប់រូបមានសុខភាពល្អ មានកម្លាំងមាំមួន ដើម្បីចូលរួមកសាងប្រទេសជាតិឱ្យកាន់តែរីកចម្រើន ។
លោកជំទាវបណ្ឌិត បានបន្តថា ទន្ទឹមនឹងការពង្រឹងនូវគុណភាព វិស័យសុខាភិបាលនេះ រាជរដ្ឋាភិបាលអាណត្តិថ្មី គ្រោងបង្កើតឱ្យមានមន្ទីរពេទ្យនៅថ្នាក់តំបន់ ដែលបំពាក់ដោយគ្រឿងបរិក្ខាពេទ្យទំនើបៗនិងល្អៗ ការវះកាត់ធំៗ ពីលើមណ្ឌលសុខភាព ឬ មន្ទីរពេទ្យបង្អែកដែលមានស្រាប់ ដែលផ្តល់ភាពងាយស្រួលដល់ពលរដ្ឋក្នុងការទៅរកសេវាសុខាភិបាល ។
លោកជំទាវបណ្ឌិត បានបន្ថែមថា សម្រាប់សកម្មភាពពិនិត្យព្យាបាលជំងឺពលរដ្ឋនៅថ្ងៃនេះ មានគ្រូពេទ្យចំនួនជាង ៤០០នាក់ ក្នុងនោះមានជំងឺទូទៅ ជំងឺមាត់ធ្មេញ ពិនិត្យអេកូ រោគស្ត្រី ជំងឺភ្នែក ជំងឺបេះដូង ជំងឺកុមារ ជំងឺត្រចៀក ច្រមុះ បំពងក សើស្បែក សន្លាក់ ឫសដូងបាត វះកាត់តូច ថតកាំរស្មី (X-Ray) និងពិនិត្យជំងឺមួយចំនួនទៀត ។
លោកជំទាវបណ្ឌិត បានបញ្ជាក់ថា សម្រាប់ប្រជាពលរដ្ឋមកទទួលការពិនិត្យព្យាបាលនេះ បើសិនអ្នកមានអាការៈធ្ងន់ធ្ងរ ត្រូវបញ្ជូនបន្តនៅមន្ទីរពេទ្យធំៗ ក្នុងរាជធានីភ្នំពេញ ដែលការចំណាយគឺជាបន្ទុករបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិតផ្ទាល់ ទាំងការធ្វើដំណើរ ព្យាបាល ហូបចុក និងការស្នាក់នៅ ។
